İyulun 5-də Avstriyanın Şpilberq qəsəbəsi yaxınlığında yerləşən “Red Bull Ring” trasında Formula 1 üzrə dünya çempionatının yeni mövsümünə start verilib. Gərgin keçən mübarizədə ”Mercedes”in pilotu Valtteri Bottas qalib gəlib. Finlandiyalı pilot bir neçə qəza və komanda yoldaşı Luis Hamiltonun vaxt cərimələrində yararlanaraq, karyerasındakı səkkizinci qələbənin sevincini yaşayıb. “Mercedes“in digər pilotu Luis Hamilton günün sonunda dördüncü yerlə kifayətlənməli olub.
Ötən il “Red Bull Ring“dən qələbə ilə ayrılan hollandiyalı pilot texniki nasazlıq səbəbindən yarışı sona qədər davam etdirə bilməyib. Qəza və texniki nasazlıqların çoxluğu nəticəsində yarışa qatılan 20 pilotdan cəmi on biri finiş xəttinə çata bilib.
Qeyd edək ki, iyulun 12-də Formula 1 üzrə dünya çempionatının növbəti dövrəsi də eyni məkanda – Şpilberqdəki “Red Bull Ring“ trasında təşkil ediləcək.
