3x3 basketbol üzrə qadın millimizin Paris-2024 Yay Olimpiya Oyunlarında iştirak etmək üçün aprelin 12-14-də keçiriləcək ilk təsnifat oyunlarının qrup mərhələsindəki rəqibləri muəyyənləşib.
Azərbaycan Basketbol Federasiyasının mətbuat xidmətindən verilən məlumata görə, 8 komandanın iştirak edəcəyi ilk təsnifat oyunlarında yığmamız B qrupunda Niderland, Monqolustan və Çili komandaları ilə qarşılaşacaq. Honkonqda keçiriləcək qrup oyunlarında qruplarda ilk iki pilləni tutan komandalar təsnifat mərhələsinin yarımfinalına vəsiqə əldə edəcəklər. Daha sonra yarımfinallarda qalib olmuş komandalar finala, finalda qələbə qazanmış kollektiv isə Olimpiadaya vəsiqə qazanacaq.
İkinci təsnifat oyunları isə mayın 16-19-da Macarıstanın Debretsen şəhərində keçiriləcək. A qrupunda qərarlaşmış millimiz, Almaniya, Polşa və Tunis yığmaları ilə üz-üzə gələcək.
Qeyd edək ki, 16 komandanın iştirak etdiyi ikinci təsnifat mərhələsində, qruplarda ilk iki yeri tutan komandalar 1/4 finala vəsiqə əldə edəcəklər. İlk təsnifat mərhələsindən fərqli, ikinci təsnifat mərhələsində təsnifat turnirini ilk 3 sırada tamamlayan yığmalar olimpiadaya vəsiqə qazanacaqlar.
Məlumat üçün bildirək ki, 8 komanda arasında keçiriləcək ilk təsnifat oyunlarında millimiz çempion olarsa, olimpiadaya vəsiqəni təmin edəcək və artıq ikinci təsnifat oyunlarında iştirak etməyəcək.
Yığmamızın Olimpiya təsnifat qruplarındakı rəqibləri müəyyənləşdi
