Azərbaycan Şahmat Federasiyasının (AŞF), Gənclər və İdman Nazirliyinin, eləcə də Milli Xalça Muzeyinin birgə təşkilatçılığı ilə keçiriləcək “Çempionların savaşı” adlı beynəlxalq şahmat turnirinin iştirakçı siyahısında dəyişiklik edilib.
Azərbaycan Şahmat Federasiyasından verilən məlumata görə, turnirdə iştirakı planlaşdırılan Hindistan şahmatının əfsanəsi, keçmiş dünya çempionu Vişvanatan Anand səhhətində yaranan narahatlıq səbəbilə Bakıya gələ bilməyəcək. Həkimlərin tövsiyəsinə əsasən səfərdən imtina edən təcrübəli qrossmeyster federasiyaya ünvanladığı məktubda gələcək yarışlarda iştirak etməkdən məmnunluq duyacağını bildirib.
Aprelin 28-dən 30-dək Milli Xalça Muzeyində keçiriləcək yarışda Azərbaycan çempionu Rauf Məmmədov özbəkistanlı dünya çempionu Rüstəm Kasımcanovla qarşılaşacaq.
Turnirdə qadınlar arasında isə Azərbaycan çempionu Günay Məmmədzadə bolqarıstanlı dünya və Avropa çempionu Antoaneta Stefanova ilə üz-üzə gələcək. Yarışın qalibi rapid və blits partiyalarının ümumi nəticələrinə əsasən müəyyən olunacaq.
