Olimpiya çempionumuz Paris-2024-dən sonra ilk sınağına çıxır

Monteneqronun paytaxtı Podqoritsada keçirilən cüdo üzrə böyüklər arasında Avropa çempionatının fərdi yarışları sona yaxınlaşır.
Olimpnews.az xəbər verir ki, bu gün komandamızın son üç üzvü tatami üzərinə çıxacaq. Təmsilçilərimiz kişilər arasında -100 kq, +100 kq və qadınlar arasında +78 kq çəki dərəcələrində mübarizə aparacaqlar. -100 kq çəki dərəcəsində Paris Olimpiadasının qalibi Zelim Kotsoyev 1/8 finalda Simeon Georgiadis (Yunanıstan) və ya Aristos Mixael (Kipr) cütünün qalibi ilə qarşılaşacaq. Ağır çəkili idmançımız Uşanqi Kokauri (+100 kq) də isə 1/16 finalda polşalı Patrik Broneç ilə üz-üzə gələcək.
+78 kq çəki dərəcəsində Nigar Süleymanova isə 1/16 finalda gürcüstanlı idmançı Sofio Somxişvili ilə mübarizə aparacaq.
Qeyd edək ki, Azərbaycan idmançıları qitə çempionatının əvvəlki günlərində dörd bürünc medal qazanıblar. Komandamızın üzvlərindən Əhməd Yusifov (-60 kq), Rəşid Məmmədəliyev (-73 kq), Zelim Tçkayev (-81 kq) və Murad Fətiyev (-90 kq) fəxri kürsünün üçüncü pilləsində yer alıb.