Azərbaycan cüdosunun canlı əfsanəsi Əhməddin Rəcəblinin 80 illik yubileyi qeyd olundu

Olimpizm xəbərləri

08.08.2025, 15:43

Azərbaycanın tanınmış idman veteranı Əhməddin Rəcəblinin 80 illik yubiley mərasimi keçirilib.

Azərbaycan İdman Akademiyasının akt zalında təşkil olunan tədbirdə gənclər və idman naziri Fərid Qayıbov Ə.Rəcəblinin uzun illər Azərbaycan idmanının inkişafı naminə çalışdığını, gənc idmançıların yetişməsində mühüm rol oynadığını bildirib. Nazir idman veteranına uzun və mənalı ömür, möhkəm cansağlığı arzu edib.

Milli Olimpiya Komitəsinin vitse-prezidenti Çingiz Hüseynzadə isə qeyd edib ki, Ə.Rəcəbli ölkədə sağlam həyat tərzinin təbliğinə töhfə verən şəxslərdən biridir.

Sonra Əməkdar məşqçinin zəngin həyat yolundan, idmana verdiyi dəyərli töhfələrdən və gənc nəslin yetişməsindəki xidmətlərindən bəhs edən videoçarx nümayiş olunub.

Ə.Rəcəbli onu sevənləri bu önəmli günündə bir arada gördüyü üçün xoşbəxt olduğunu söyləyib.

Milli Olimpiya Komitəsinin vitse-prezidenti Fərid Mansurov Ə.Rəcəblinin Azərbaycanın cüdo və paracüdo tarixində böyük iz qoyduğunu diqqətə çatdırıb. MOK-un vitse-prezidenti, İdman Veteranları İctimai Birliyinin sədri Zemfira Meftaxetdinova isə idman veteranının nəcib və gözəl xüsusiyyətlərə malik insan olduğunu vurğulayıb.

Paracüdo üzrə ikiqat Paralimpiya çempionu İlham Zəkiyev idmanın sirlərini məhz Rəcəblidən öyrəndiyini deyib və buna görə ona minnətdarlığını bildirib.

Sonra Azərbaycan cüdosunun canlı əfsanəsinə orden, xatirə hədiyyələri və idmanın inkişafında göstərdiyi misilsiz xidmətlərə görə diplom və təşəkkürnamələr təqdim edilib.