Azərbaycanın şosse velosipedi üzrə yığma komandası və Sloveniyanın "BTC Llubljana" Dünya Turu komandasının üzvü Yelena Pavluxina Rio-2016 Yay Olimpiya Oyunlarına vəsiqə qazanmaq uğrunda növbəti lisenziya xalları əldə edib. Velosipedçimiz Çində keçirilən "Tour of Zhoushan Island" turunda aktivinə daha 12 reytinq balı yazdırıb.
Beynəlxalq Velosipedçilər İttifaqının (UCİ) 2.2 kateqoriyalı üçgünlük yarışının yekununa əsasən, yığma komandamzın üzvü ümumi təsnifatda 70 velosipedçi arasında 4-cü olub. Qeyd edək ki, Yelena Pavluxina mayın 6-8-də Çində keçirilən digər bir yarış - dünya turu statusunu daşıyan "Tour of Chongming" veloturunda da uğurla çıxış edib və ümumi təsnifatda 9-cu olaraq 30 reytinq xal qazanmışdı.
12 xalı nəzərə almasaq, hazırda idmançımız aktivindəki 137 reytinq xalı ilə Beynəlxalq Velosipedçilər İttifaqının (UCİ) reytinq sıralanmasında 685 qadın velosipedçi arasında 70-ci yerdə qərarlaşır. Bu isə Yelena Pavluxinaya Rio-2016 Yay Olimpiya Oyunlarına lisenziya qazanmaq şansı verir. Qeyd edək ki, UCİ qaydalarına əsasən, qadın velosipedçilərin reytinq xallarını toplaması prosesi mayın 31-də başa çatacaq və yalnız bundan sonra Olimpiya Oyunlarına vəsiqə qazanacaq velosipedçilərin adlarına aydınlıq gələcək.
