Beynəlxalq Velosipedçilər İttifaqının 2.2 kateqoriyalı Slovakiya Turu ölkəmizin "Synergy Baku" kontinental komandası üçün uğurlu sonluqla başa çatıb. Belə ki, velosipedçimiz Kiril Pozdnyakov ümumi sıralamada fəxri kürsünün 3-cü pilləsinə qalxıb.
"Olimpnews.az” xəbər verir ki, yarışın 2-ci mərhələsində finiş xəttini 2-ci keçməklə ümumi təsnifatda 3-cü pilləyə yüksələn Pozdnyakov, bu mövqeyini sonadək qoruyub və beşgünlük yarışın qalibi, İtaliyanın "Unieuro Wilier" komandasının üzvü Mauro Finettodan cəmi 9 saniyə geri qalıb.
23 komandanın çıxış etdiyi yarışda "Synergy Baku" Maksim Averin, Elçin Əsədov, Samir Cəbrayılov, Aleksandr Surutkoviç və Kiril Pozdnyakovla təmsil olunur. Sayca 60-cı dəfə keçiriən Slovakiya Turuna iyunun 12-də yekun vurulub.
