Azərbaycan Velosiped İdmanı Federasiyasının təqvim planına uyğun olaraq Respublika Velotrekində qrup ötüşmələri üzrə mövsümün son yarışı keçirilib.
Yarışda müxtəlif klub və cəmiyyətlərin 50-dən artıq idmançısı qüvvəsini sınayıb.
"Olimpnews.az" xəbər veriri ki, qadın velosipedçilərin mübarizəsində ilk 3 pillədə 8 saylı Olimpiya İdman Məktəbinin velosipedçiləri qərarlaşıblar. Belə ki, Viktoriya Sidorenko 1-ci, Ayan Xankişiyeva 2-ci, Elfanə Camalova isə 3-cü yeri tutub.
15 yaşadək oğlanların yarışı Olimpiya Ehtiyatları İxtisaslaşdırılmış Velosiped Məktəbinin üzvü Nikita Sıtovun qələbəsi ilə yekunlaşıb. Onun komanda yoldaşı Natiq Maydarov isə 3-cü olub. 2-ci yerdə isə 8 saylı Olimpiya İdman Məktəbinin təmsilçisi Vəli İbrahimov qərarlaşıb.
U-17 yaş kateqoriyasında Olimpiya Ehtiyatları İxtisaslaşdırılmış Velosiped Məktəbinin yetirməsi İvan Orlov bütün rəqiblərini qabaqlayıb. Adı çəkilən məktəbin digər üzvləri Nicat Bağırov 2-ci, Qadir Mustafayev 3-cü, Osman Qəhrəmanov isə 4-cü yeri tutublar.
Gənclər, U-23 və Elit kateqoriyasında mükafatalayiq yerlər 8 saylı Olimpiya İdman Məktəbinin velosipedçiləri Maksim Naperstkov, Mikayıl Səfərli və Kənan Qəhrəmanlı sahib çıxıblar.
Qalib və mükafatçılar qiymətli hədiyyələr və pul mükafatı ilə təltif ediliblər.
