Pəhləvanlarımız beynəlxalq turnirində yarışacaqlar

Pəhləvanlarımız beynəlxalq turnirində yarışacaqlar

Yanvarın 10-dan 12-dək İstanbulda sərbəst və qadın güləşi üzrə Avropa, dünya və Olimpiya çempionu Yaşar Doğunun xatirə turniri keçiriləcək.
Ənənəvi yarışda ölkəmizi həm sərbəst, həm də qadın güləşçilərimiz təmsil edəcəklər. Kişilərin mübarizəsində ölkəmizi baş məşqçi əvəzi Zəlimxan Hüseynov və məşqçi Arif Abdullayevin rəhbərliyi altında Əfqan Xaşalov, Pərviz İbrahimov, Georgi Edişeraşvili (hamısı 57 kq), İntiqam Vəlizadə, Ruslan Qasımov (hər ikisi 61 kq), Əli Rəhimzadə, Turan Bayramov (hər ikisi 65 kq), Ağahüseyn Mustafayev (70 kq), Toğrul Əsgərov, Hacımurad Hacıyev, Hacımurad Ömərov (hamısı 74 kq), Abubakr Abakarov (79 kq), Cəbrayıl Həsənov, Osman Nurməhəmmədov, Hacımurad Məhəmmədsəidov (hamısı 86 kq), Şamil Zubairov, Aslanbek Alborov (hər ikisi 92 kq) və Camaləddin Məhəmmədov (125 kq) təmsil edəcəklər.
Qadınların yarışında baş məşqçi Aslan Ağayev və məşqçi Rövşən Umudovun rəhbərliyi altında Türkan Nəsirova (50 kq), Tatyana Varansova (53 kq), Alyona Kolesnik (57 kq), Elmira Qəmbərova, Tatyana Omelçenko (hər ikisi 62 kq), Elis Manolova (65 kq), İrina Netreba (68 kq) və Səbirə Əliyeva (76 kq) qüvvələrini sınayacaqlar.
Nümayəndə heyətinə Azərbaycan Güləş Federasiyasının vitse-prezidenti Firdovsi Umudov rəhbərlik edəcək.
On beşə yaxın ölkədən pəhləvanların çıxış edəcəyi turnir İstanbul Bağçılar Qapalı İdman Salonunda təşkil olunacaq. Beynəlxalq dərəcəli hakim Xəzər Allahverdiyev 48-ci dəfə keçiriləcək ənənəvi yarışda ədaləti qoruyacaq. Turnir Türkiyənin “TRT Spor-2” telekanalı tərəfindən canlı yayımlanacaq.
Yarışın proqramına gəlincə, yanvarın 10-da sərbəst güləşdə 57, 65, 70, 86 və 97, qadın güləşində isə 50, 57 və 68 kiloqram çəki dərəcələrində mübarizəyə start veriləcək. Qadın güləşində 3 kateqoriya üzrə medalçılar ilk yarış günündə müəyyənləşəcək. Sərbəst güləşdə 5 çəki üzrə təsəlliverici və medal qarşılaşmaları yanvarın 11-də baş tutacaq. İkinci yarış günündə sərbəst güləşdə 61, 74, 79, 92 və 125, qadın güləşində isə 53, 59, 65 və 72 kiloqram çəki dərəcələrində çıxış edən güləşçilər də mübarizəyə qoşulacaqlar. Qadınların bu çəkilər üzrə çıxışına həmin gün yekun vurulacaq. Yanvarın 12-də sərbəst güləş üzrə son 5 çəkidə təsəlliverici və medal görüşləri keçirilməklə yanaşı, 55, 62 və 76 kiloqram çəki dərəcələrində iştirak edən qadınlar arasında qaliblərin adları məlum olacaq.