“Mənə qarşı olan təzyiq xoş deyildi”

“Mənə qarşı olan təzyiq xoş deyildi”


Millimizin Rusiya yığması ilə oyunundan sonra rəqib komandanın sağ cinah yarımmüdafiəçisi Aleksandr Səmədov yerli mətbuata müsahibə verdi. Moskva "Lokomotiv”inin futbolçusu ona qarşı edilən təzyiqlərə də aydınlıq gətirdi.

- Oyunun yekun nəticəsindən razı qaldınızmı?
- Yaxşı oyun alındı. Maraqlı qarşılaşma keçdi. Heç-heçə qeydə alındı. Ancaq qələbə qazanmaq istəyirdik.

- Sizə qarşı yerli azarkeşlər tərəfindən təzyiq var idi...
- Elədir. Ancaq mənə qarşı olan təzyiq xoş deyildi.

- Siz belə təzyiqi gözləyirdiniz?
- Xeyr. Azarkeşlərin mənə qarşı belə təzyiq edəcəyini gözləməzdim.

- Belə reaksiya sizin Azərbaycan haqqında təəssüratlarınızı korlamadı ki?
- Yox. Onun buna dəxli yoxdur. Ölkə haqqında təəssüratlarım əladır. Bakı mənim xoşuma gəldi.

- Sizin şəhəri görmək imkanınız oldu?
- Əlbəttə. Biz stadiona avtobusla gəlmişik. Həmin yarım saat ərzində şəhəri görmək imkanım oldu. Gözəl şəhərdir.

- Oyundan sonra siz Rəşad Sadıqova yaxınlaşdınız. Onunla nə haqqında söhbət etdiniz?
- Biz sadəcə oyundan əvvəl verdiyimiz açıqlamalara aydınlıq gətirməyə çalışdıq. Bir-birimizin əlini sıxdıq. Ümumilikdə bir-birimizi başa düşdük və normal şəkildə ayrıldıq.

- Vətəniniz Azərbaycandır. Buranın millisini seçməməyinizin səbəbini bilmək olar?
- Mənim atam azərbaycanlıdır. Özüm isə Rusiyada, Moskvada doğulmuşam. Ona görə də Rusiya millisində oynayıram. Yığmada hansı milləti təmsil etməyin əhəmiyyəti yoxdur. Əsas doğulduğun yerdir.