Namiq Abdullayev: "Olimpiadada hər bir güləşçimizdən medal gözləyirik"

$Namiq Abdullayev: \"Olimpiadada hər bir güləşçimizdən medal gözləyirik\"$

Olimpizm xəbərləri

02.08.2024, 17:33

"Heyətin hər bir üzvü kifayət qədər təcrübəlidir və böyük yarışlarda iştirak edib. Təbii ki, biz olimpiadada hər bir güləşçimizdən medal gözləyirik".

Bu sözləri "Olimpnews.az"a açıqlamasında Milli Olimpiya Komitəsinin, Azərbaycan Güləş Federasiyasının (AGF) İcraiyyə Komitəsinin üzvü, Olimpiya çempionu Namiq Abdullayev deyib.

O, Azərbaycan Preizdenti cənab İlham Əliyevin güləşə xüsusi diqqət və qayğı göstərdiyini deyib: "Cənab prezident İlham Əliyev və 1-ci vitse-prezident Mehriban Əliyeva bütün idman növlərinə olduğu kimi, daim güləşə də xüsusi münasibət göstərib, diqqət və qayğı ilə əhatə edib. Həmçinin, Gənclər və İdman Nazirliyinin, o cümlədən Milli Olimpiya Komitəsinin dəstəyini hər zaman hiss etmişik. Yarışlara ezam, vitaminlə təminat və olimpiyaçılara təqaüdün verilməsi bu diqqətin göstəricisidir. Azərbaycan Güləş Federasiyası komandalarımızın Paris-2024 Yay Olimpiya Oyunlarına maksimum yüksək səviyyədə hazırlaşması üçün əlindən gələni edir. Başda federasiya prezidenti olmaqla, qurumun hər bir əməkdaşının bu işdə əməyi var. Bakıda, bölgələrdə və ölkə xaricində yüksək səviyyədə təlim-məşq toplanışları keçirilib. Amerikadan dəvət edilmiş fiziki hazırlıq üzrə mütəxəssis Mark Alan Filippinin də təlim-məşq toplanışlarında iştirakını qeyd etməliyəm. Bu mütəxəssis güləşçilərimizdə fiziki hazırlığın və dözümlülüyün yüksəldilməsi yönündə məşqlər keçir. Bir sözlə, komandalarımızın olimpiadaya ən yaxşı formada yollanması üçün lazım olan bütün işlər görülüb. İndi qalır məşqçilərin və güləşçilərin Paris-2024-də bunun qarşılığını verməsi".

Namiq Abdullayev proqnoz verməyin mümkün olmadığını da söyləyib: "İdmançıda fiziki, taktiki-texniki və psixoloji hazırlıq vəhdət təşkil etməlidir. Bunlar hamısı qaydasında olanda uğurlu nəticə əldə etmək mümkündür. Həmin gün idmançının günü olmalıdır. Bəzən sürpriz şəkildə zədə və ya xəstəlik uğur qazanmağa imkan vermir. Təki, güləşçilərimiz heç bir problemlə üzləşməsinlər və xalqımızın ümidlərini doğrultsunlar. Fürsətdən istifadə edib, Olimpiya komandamızın bütün üzvlərinə uğurlar arzulayıram. Növündən asılı olmayaraq, hər bir idmançımıza inanır və dəstəkləyirik. Dualarımız onlarladır".

Qeyd edək ki, Azərbaycanı Paris-2024-də sərbəst güləşdə Əliabbas Rzazadə (57 kq), Hacı Əliyev (65 kq), Turan Bayramov (74 kq), Osman Nurmaqomedov (86 kq), Maqomedxan Maqomedov (97 kq), Giorgi Meşvildişvili (125 kq), yunan-Roma güləşində Murad Məmmədov (60 kq), Həsrət Cəfərov (67 kq), Sənan Süleymanov (77 kq), Rafiq Hüseynov (87 kq), Sabah Şəriəti (130 kq), qadın güləşində isə Mariya Stadnik (50 kq) təmsil edəcək.