İyunun 13–20-də Macarıstanın paytaxtı Budapeştdə cüdo üzrə böyüklər arasında dünya çempionatı keçiriləcək.
Mötəbər turnirdə ölkəmizi 10 çəki dərəcəsində 13 (9 kişi, 4 qadın) cüdoçu fərdi yarışlarda təmsil edəcək.
Artıq komandamızın çempionata hazırlıq prosesi yekunlaşıb. 
Cüdo üzrə milli komandamızın böyük məşqçisi, dünya çempionu Elxan Məmmədovla mundiala hazırlıqla bağlı həmsöhbət olduq. Mütəxəssis komandamızın hazırlıq prosesi və cüdoçularımızın şansları barədə danışıb. 

- Elxan müəllim, cüdo üzrə dünya çempionatı artıq start ərəfəsindədir. Komandamızın ümumi hazırlıq vəziyyəti necədir?
- Komandamızın hazırlıq səviyyəsi çox yaxşıdır. Heyətdə müsbət əhval-ruhiyyə var. Demək olar ki, millimizin bütün üzvləri çəkisalma prosesindədirlər. Hər şey qaydasındadır.

- İstərdik ki, bir qədər də komandamızın hazırlıq mərhələsi barədə məlumat verəsiniz. 
- Millimiz yanvar ayından təlim-məşq toplanışlarına başlayıb. Avstriya, Fransa və Belçikada hazırlıq prseslərində iştirak edik. Komandamız həmçinin Yaponiyada “Gündoğar ölkə” təmsilçiləri ilə birgə hazırlıq keçib. Ölkə xaricində son hazırlıq prosesi isə İspaniyada təşkil olunub. Millimizin son hazırlığı isə Bakıda olub.  

- Son Olimpiya Oyunları ilə müqayisədə kişilərdən ibarət milli komandamızın heyətində müəyyən dəyişiklikləri görmək olur. Xüsusilə də aşağı çəki dərəcələrində yeni simalar yer alıb. Bir qədər bu dəyişikliklər barədə məlumat verərdiniz. 
- Son olimpiadada millimizi aşağı çəkilərdə Balabəy Ağayev və Yaşar Nəcəfov təmsil edib. Budəfəki dünya çempionatında isə demək olar ki, başqa bir heyətlə təmsil olunacağıq. Onlardan biri 60 kq çəki dərəcəsində mübarizə aparan Əhməd Yusifov, digəri isə 66 kq çəkili idmançımız Ruslan Paşayevdir. Ruslan bu il Parisdəki “Böyük Dəbilqə” turnirinin qalibi olub. Əhməd Yusifov isə Bakıda keçirilən “Böyük Dəbilqə” və sonuncu Avropa çempionatında bürünc medal qazanıb. Bundan başqa 73 kiloqram çəki dərəcəsində Rəşid Məmədəliyev də yığmanın heyətinə daxil olub. O, bu il Monteneqroda keçirilən Avropa çempionatında gözəl çıxış edərək bürünc medal qazanıb. Bir sözlə, bu nəticələr həmin cüdoçuların dünya çempionatına gedən yolunu açdı. Əlbəttə, belə idmançıların heyətə cəlb edilməsi müəyyən çəkilərdə rəqabətin daha çox olduğunu göstərir. Biz onların hər birindən dünya çempionatında uğurlu nəticə gözləyirik.  

- Millimizin heyətində fiziki və psixoloji durum necədir? Dünya çempionatı kimi məsuliyyətli yarış öncəsi məşqçilər heyəti hansı detallara daha çox diqqət yetirir?
- Dünya çempionatı sıradan bir yarış deyil. Bu ilin ən mötəbər idman hadisələrindən biridir. Azərbaycan komandası bu yarışda 9 idmançı ilə təmsil olunacaq. Onların hər biri beynəlxalq arenalarda fərqlənmiş idmançılardır. Demək olar ki, heyətdə yer alan hər bir cüdoçu illər ərzində güləşmiş və psixoloji hazırlığa malikdir. Hər bir idmançımız bu turnirin mahiyyətini yaxşı dərk edir və psixoloji olaraq bu yarışa hazırdır. Biz də məşqçilər heyəti olaraq bacardığımız qədər komandamıza lazimi dəstəyi göstərəcəyik. 

- Ötən mundialdakı uğurlu nəticələr məsuliyyəti daha da artırır. Burada əsasən lider idmançılarımızın - Hidayət Heydərov və Zelim Kotsoyevin çıxışını nəzərdə tuturam. Zelim olimpiadadan sonra Avropa çempionatında iştirak etsə də, Hidayət üçün bu turnir dördilliyin zirvə yarışından sonra ilk ciddi sınaq olacaq. Necə düşünürsünüz, bu qədər aradan sonra idmançılarımız həmin uğuru yenidən təkrarlaya biləcəklərmi?
- Təbii ki, yığmamızın əsas üzvlərindən hesab edilən Hidayət Heydərov və Zelim Kotsoyev yarışa dünya, Avropa və Olimpiya çempionu qismində yollanırlar. Onlar hansı yarışda iştirak etiklərinin fərqindədirlər. Çalışacaqlar ki, bu çempionatda öz titullarını qorusunlar. Zelim Avropa  çempionatında çıxış etdi. Amma Hidayət müəyyən səbəblərə görə bu yarışı buraxmalı oldu. Çünki o, yarış ərəfəsində xəstələnmişdi. Amma Hidayət möhkəm iradəyə və motivasiyaya malik olan bir idmançıdır. İnanıram ki, bu mundialda uğurla çıxış edəcək. Həm Zelimdən, həm də Hidayətdən yeni qələbələr gözləyirik.
 
- Elxan müəllim, dünya çempionatında rəqiblərimizin siyahısına nəzər yetirsək kifayət qədər dünya, Avropa və Olimpiya çempionlarının adlarını görmək olar. Belə titullu idmançılarla rəqabətdə komandamızın medal şanslarını necə dəyərləndirirsiniz? 
- Dünya çempionatında yaponiyalı və rusiyalı idmançıların, eləcə də Koreya kimi zəngin cüdo ənələrinə malik olan ölkələrin işirak etməsi bizi gərgin mübarizələrin gözlədiyindən xəbər verir. Amma Azərbaycanın da cüdo ənənələri var. Necə deyərlər, biz də zəif ölkə deyilik. Dünya miqyasında öz sözünü deyən cüdoçularımız və kifayət qədər güclü komandamız var. Əlbəttə, şanslarımız böyükdür. Hər bir çəkidə medal üçün mübarizə aparacağıq. Çünki son yarışlar, xüsusən də son dünya çempionatı və Olimpiya Oyunlarındakı nəticələrimiz belə deməyə əsas verir. Azərbaycan cüdosuna diqqət və qayğı böyükdür. Federasiya rəhbərliyi tərəfindən cüdoçularımıza hərtərəfli şərait yaradılıb. Ümid edirəm ki, hər şey yaxşı olacaq. 

- Azərbaycanın üç dünya çempionundan birincisisiniz. Növbəti ad sizcə hansı ola bilər?
- Hər bir cüdoçumuzun uğurla çıxış edəcəyinə inanıram. Sözün düzünü desəm, yenidən Hidayət Heydərovdan, Zelim Kotsoyevdən çempionluq gözləyirik. Bundan başqa Elcan Hacıyev və Zelim Tçkayevdən də qızıl medal gözləməyə dəyər. Şanslarımız var. Görək necə olacaq.
 

Azər Əlizadə