Bakıda keçirilən IV İslam Həmrəyliyi Oyunlarının üçüncü gününə yekun vurulub.
"Olimpnews.az” xəbər verir ki, bu gün Azərbaycan milli komandası üçün uğur və rekordlarla zəngin olub. Yığmamız bir gün ərzində 28 medal əldə edib. Qızıl medal sayını da artıraraq 14-ə çatdıran idmançılarımız 8 gümüş və 6 bürünc də əldə ediblər.
İki dəfə çempionluq yaşayan Marina Durunda (bədii gimnastika, halqa və lent), həmçinin idman gimnastikası üzrə qadınlardan ibarət yığma (Yuliya İnşına, Marina Nekrasova, Mariya Smirnova, Yekaterina Tişkova), Ruslan Lunyov (güllə atıcılığı, tapança, 25 m), Roman Heydərov (karate, kata), Məmmədəli Mehdiyev (cüdo, 90 kq), Maksim Şemberov (üzgüçülük, sərbəst üsulla 1500 metr), qadınlardan ibarət həndbol yığması, Elxan Məmmədov (cüdo, 100 kq), İrina Zaretska (karate, 68 kq), Ayxan Mamayev (karate, 84 kq), Jalə Piriyeva (bədii gimnastika, top), Elçin Talıbov (paracüdo, 66 kq) və Ramil Qasımov (paracüdo, 73 kq) fəxri kürsünün ən yüksək pilləsinə qalxıb.
Gümüş medala isə idman gimnastikası üzrə kişilərdən ibarət yığma (Murad Ağarzayev, Timur Bayramov, Bense Talas), Elmar Qasımov (cüdo, 100 kq), İrina Kindzerska (cüdo, +78 kq), Marina Durunda (bədii gimnastika, gürzlər), Fəridə Əliyeva (karate, +68 kq), Jalə Piriyeva (bədii gimnastika, lent), Bayram Mustafayev (paracüdo, 66 kq), Kənan Abdulxanlı (paracüdo, +100 kq) yiyələnib.
Jalə Piriyeva (bədii gimnastika, halqa), Marina Durunda (bədii gimnastika, top), Asiman Qurbanlı (cüdo, +84 kq), Natiq Talıbov (paracüdo, 73 kq), Rövşən Səfərov (paracüdo, 90 kq), İlham Zəkiyev (paracüdo, +100 kq) İslamiadanın bürünc mükafatına sahib olub.
Bununla da ümumi medallarımızın sayı 50-yə çatıb. Bunun 24-ü qızıl, 17-si gümüş, 9-u bürüncdü. Yığmamız bu göstərici ilə İslam Həmrəyliyi Oyunlarının medal sıralamasında 1-ci pillədə qərarlaşıb.
Ümumilikdə isə yarışın 3-cü günündə 39 dəst medal sahibini tapıb. Arxada qalan müddətdə isə 69 dəst mükafatçı müəyyənləşib.
Qeyd edək ki, 24 ölkə medalçılar siyahısında yer alıb. 13 ölkə isə çempionluq sevinci yaşayanlardır.
