jpg-1593865889.jpg)
Norveçli dünya çempionu Maqnus Karlsen “Chessable Masters” yarışının final oyununun ilk matçında hollandiyalı şahmatçı Aniş Qirini məğlub edib. İyulun 3-də onlayn formatda keçirilən matçda M.Karlsen tay-brekdə rəqibinə 3,5:2,5 hesabla qalib gəlib.
Bu gün mərhələnin ikinci matçı oynanılacaq. Qeyd edək ki, “Chessable Masters” M.Karlsenin təşkilatçılığı ilə keçirilən seriya turnirinin üçüncü mərhələsidir. Bu mərhələnin B qrupunda mübarizə aparan Azərbaycan şahmatçısı Teymur Rəcəbov məğlub olduğu üçün yarışda iştirakını dayandırıb. Turnirin mükafat fondu 150 min ABŞ dollarıdır.
Xatırladaq ki, beş yarışdan ibarət seriya turnirinin birinci mərhələsinin - “Magnus Carlsen Invitational” yarışının qalibi M.Karlsen olub. İkinci mərhələdə - “Lindores Abbey Rapid Challange” turnirində isə rusiyalı şahmatçı Daniel Dubov qələbə qazanıb. Seriya çərçivəsində növbəti mərhələ - “Legends of Chess” iyulun 21-dən avqustun 5-dək təşkil ediləcək. Avqustun 9-dan 20-dək isə böyük final keçiriləcək.
