Daha əvvəl xəbər verdiyimiz kimi, 7-17 dekabr tarixlərində Özbəkistanın paytaxtı Daşkənddə keçiriləcək ağırlıqqaldırma üzrə dünya çempionatında Azərbaycan idmançıları təmsil olunmayacaq.
Bununla belə, Azərbaycanı orada texniki rəsmi şəxs (hakim) kimi təmsil edən şəxs olacaq.
Bu, 62 yaşlı beynəlxalq dərəcəli hakim Vahid Nəzərovdur. Ona bununla bağlı Beynəlxalq Ağırlıqqaldırma Federasiyasının (IWF) müvəqqəti prezidenti Maykl İrani və baş katibi Məhəmməd Jalud tərəfindən imzalanmış məktub gəlib.
Qeyd edək ki, dünya çempionatı vaxtı IWF-də prezidentlik də daxil olmaqla yüksək postlara seçkilər keçiriləcək. Vahid Nəzərovun namizədliyi qurumun İcraiyyə Komitəsinə, Texniki şöbəsinə (hakimlik üçün) və Elmi Şurasına (məşqçilik üçün) verilib.
