Beynəlxalq Avtomobil Federasiyası (FIA) Baş Assambleyasının Heydər Əliyev Mərkəzində illik yekun iclası keçirilir.
Tədbirdə FIA prezidenti Mohammed Ben Sulayem, Azərbaycan Avtomobil Federasiyasının prezidenti Anar Ələkbərov və digər rəsmi şəxslər çıxış ediblər.
Anar Ələkbərov FIA Baş Assambleyası və Mükafatlandırma mərasiminin Bakıda təşkil olunmasının əhəmiyyətindən bəhs edib. O, bu kimi tədbirlərin məqsədinin ictimaiyyətin avtomobil idmanı sahəsinə marağının artmasına, Azərbaycanda bütün yol hərəkəti iştirakçılarını təhlükəsiz, dayanıqlı və əlçatan hərəkətlilik mövzusunda maarifləndirməyə yönəldiyini bildirib: “Azərbaycan Avtomobil Federasiyası mütəmadi olaraq avtoidman sahəsində yarışlar, drift məşqləri, yolsuzluq avtomobilləri yürüşləri, kartinq yarışları, klassik avtomobillərin nümayiş olunduğu sərgi və yürüşlər, həmçinin, digər layihələr həyata keçirir”.
Azərbaycanın 2016-cı ildən “Formula 1” yarışlarına ev sahibliyi etdiyini xatırladan Anar Ələkbərov Bakı küçələrində Qran-prinin uğurla həyata keçirilməsində göstərdiyi dəstəyə görə FIA-ya təşəkkürünü çatdırıb.
O cümlədən, Bakıda FIA həftəsinin uğurla keçməsində və yaddaqalan alınmasında əməyi olan hər kəsə, eyni zamanda, FIA əməkdaşlarına və könüllülərə minnətdarlıq bildirilib.
