Azərbaycan Basketbol Liqasında müntəzəm mövsümün sonuncu - XX turunun oyunları davam edir. Bu gün turun daha iki qarşılaşması keçiriləcək.
A qrupunda təşkil olunacaq görüşlər çərçivəsində "Sərhədçi" və NTD komandaları Bakı İdman Sarayında üz-üzə gələcək. Hər iki komanda hazırda 25 xala malikdir. "Sərhədçi" qrupda beşinci, NTD isə altıncı pillədə qərarlaşıb.
Günün digər qarşılaşması Abşeron Olimpiya Kompleksində baş tutacaq. Burada "Abşeron" və "Neftçi" komandaları üz-üzə gələcək. Turnir cədvəlində "Neftçi" 29 xalla üçüncü yerdə qərarlaşıb, "Abşeron" isə 27 xalla dördüncü pillədə yer alır.
Hər iki görüş bu gün saat 19:00-da start götürəcək.
Qeyd edək ki, XX turun əvvəlki matçlarında "Şəki" "Lənkəran"ı 107:78, "Ordu" isə "Quba"nı 97:88 hesabı ilə məğlub edib. Tura aprelin 6-da yekun vurulacaq.