Azərbaycanın kontinental velosiped komandası "Synergy Baku” 2015-ci ildə ilk qələbəsini qazanıb. Xorvatiyada 30 komandanın iştirakı ilə təşkil edilən Beynəlxalq Velosipedçilər İttifaqının 2.2 kateqoriyalı "Istrian Spring Trophy” yürüşü komandamızın üzvü Markus Eybegerin çempionluğu ilə yadda qalıb.
Xorvatiyada Maksim Averin, İsmayıl İlyasov, Markus Eybeger, Dennis van Vinden və Yannis Tamuridisdən ibarət heyətlə yarışan "Synergy Baku” əla komanda yürüşü nümayiş etdirib. Velosipedçilərimiz 1-ci mərhələdə 2-ci, 2-ci mərhələdə isə 1-ci olmaqla, ümumi liderliyi ələ keçirən Eybegerin sonuncu yarış günündə də lazımi nəticəni əldə etməsinə şərait yaradıb.
156 km-dən ibarət bu mərhələdə Markus Eybeger yalnız 49-cu yeri tutsa da, ən yaxın izləyicisi, Rusiyanın "İtera-Katyuşa” komandasının üzvü Sergey Nikolayevlə 8 saniyəlik fərqi qoruyub və bununla da yarışın qalibinə verilən "sarı köynəyi” qazanmaqla "Synergy Baku”ya 2015-ci ildə ilk çempionluq sevinci yaşadıb.
