Futbol üzrə UEFA Avropa Liqasının onaltıdabir final mərhələsinin oyunlarına yekun vurulub. Azərbaycan millisinin futbolçusu Mahir Emrelinin çıxış etdiyi "Dinamo" (Zaqreb) komandası Xorvatiyada İspaniyanın "Sevilya" klubu ilə qarşılaşıb. Görüş Zaqreb təmsilçisinin 1:0 hesablı qələbəsi ilə yekunlaşıb.
Oyuna ehtiyatda başlayan Emreli 62-ci dəqiqədə Bruno Petkoviçin yerinə meydana daxil olub. Qol da məhz 25 yaşlı forvardın meydana çıxmasından sonra vurulub. Matçın 65-ci dəqiqəsində Mislav Orşiç penaltidən fərqlənib. Qələbəyə baxmayaraq, ilk görüşdə 1:3 hesabı ilə uduzan "Dinamo" mübarizəni dayandırıb. "Sevilya" isə 1/8 finala finala yüksəlib.
Gecənin maraqla gözlənilən oyunlarından biri İtaliyada oynanılıb. İspaniyanın “Barselona” klubu səfərdə “Napoli” ilə qarşılaşıb. Görüş Kataloniya təmsilçisinin 4:2 hesablı qələbəsi ilə başa çatıb. Beləliklə, “Barselona” klubu iki oyunun nəticəsinə görə 5:3 hesabı ilə qalib gələrək növbəti mərhələyə vəsiqə qazanıb.
Gecənin digər maraqla gözlənilən oyununda isə "Reyncers" Şotlandiyada Almaniyanın "Borussiya" (Dortmund) komandası ilə qarşılaşıb. Görüş 2:2 hesablı heç-heçə ilə yekunlaşıb. Nəticədə meydan sahibləri ilk görüşdəki 4:2 hesablı qələbə sayəsində səkkizdəbir finala vəsiqə qazanıb.
Mərhələnin bütün görüşlərində aşağıdakı hesablar qeydə alınıb:
"Dinamo" (Zaqreb, Xorvatiya) - Sevilya" (İspaniya) - 1:0 (ilk oyun - 1:3);
"Olimpiakos" (Yunanıstan) - "Atalanta" (İtaliya) - 0:3 (1:2);
"Real Sosyedad" (İspaniya) - "Leyptsiq" (Almaniya) - 1:3 (2:2);
"Latsio" (İtaliya) - "Portu" (Portuqaliya) - 2:2 (1:2);
"Napoli" (İtaliya) - "Barselona" (İspaniya) - 2:4 (1:1);
"Reyncers" (Şotlandiya) - "Borussiya" (Dortmund, Almaniya) - 2:2 (4:2);
"Real Betis" (İspaniya) - "Zenit" (Rusiya) - 0:0 (3:2).