Qadınlar və kişilər arasında cüdo üzrə Bakı çempionatında ilk qaliblər müəyyənləşib. Fövqəladə Hallar Nazirliyinin (FHN) Bakı şəhərinin Hövsan qəsəbəsində yerləşən İdman-sağlamlıq klubunun idman arenasında keçirilən yarışın ilk günündə qadınlar və kişilər arasında 3 çəki dərəcəsində 190 idmançı medallar uğrunda mübarizə aparıb.
Qadınların yarışında Leyla Dəmirova (48 kq), Xədicə Qədəşova (57 kq), Nigar Əlibəyli (63 kq), kişilər arasında isə Nizami İmranov (60 kq), Asim Qulamzadə (73 kq), Elcan Şəfiyev (81 kq) qalib adını qazanıblar.
Bakı çempionatına bu gün yekun vurulacaq.
Yarışda paytaxt Bakının müxtəlif klublarından, cəmiyyətlərindən və idman təşkilatlarından 303 (262 kişi, 41 qadın) cüdoçu medallar uğrunda mübarizə aparır.
Turnirin əsas məqsədi bu il dekabrın 2-5-də keçiriləcək Azərbaycan çempionatına namizədlərin seçimidir. Eyni zamanda, gənclər arasında idman vasitəsi ilə sağlam həyat tərzinin formalaşdırılması, həmçinin cüdonun kütləvi təbliğinə və təşviqinə nail olmaqdır.
