Basketbolun 3x3 növü üzrə kişilərdən ibarət milli komandamız Avropa çempionatının əsas mərhələsinə vəsiqə qazanıb. Kiprin Limassol şəhərində keçirilən Avropa çempionatının seçmə mərhələsində B qrupunda mübarizəyə başlayan millimiz Kipr, Lüksemburq və Andorra komandaları ilə qarşılaşıb. İlk görüşdə Kipr basketbolçuları ilə qarşılaşan yığmamız rəqibinə 19-11 hesabı ilə qalib gəlib. İkinci qarşılaşmada komandamız Lüksemburq yığması ilə üz-üzə gəlib və oyundan 16-10 hesablı qalibiyyətlə ayrılıb. Qrupun sonuncu oyununda millimiz Andorra basketbolçuları ilə görüşüb və rəqibinə 21-13 hesabı ilə qalib gəlib.
Qrupu ilk pillədə tamamlayan milli komandamız turnirin yarımfinal mərhələsinə vəsiqə qazanıb.
Komandamız seçmə mərhələnin yarımfinal oyununda Lüksemburq basketbolçuları ilə qarşılaşıb. Yığmamız oyundan 15-13 hesablı qələbə ilə ayrılıb və adını turnirin finalına yazdırıb. Finalda millimiz İrlandiya komandası ilə qarşılaşıb və meydandan 20-16 hesablı qələbə ilə ayrılıb. Bununla da, yığma komandamız sentyabrın 9-11-də Avstriyanın Qratz şəhərində təşkil olunacaq Avropa çempionatının final mərhələsinə vəsiqə qazanıb.
Qeyd edək ki, millimiz basketbolun 3x3 növü üzrə 2014-cü ildən sonra ikinci dəfə Avropa çempionatının əsas mərhələsinə yüksəlib.
Millimiz Avropa çempionatının əsas mərhələsinə vəsiqə qazandı
