Bakıda səfərdə olan UEFA-nın I vitse-prezidenti Şenes Erzik jurnalistlər üçün brifinq keçirdi. AFFA-nın keçirdiyi İcraiyyə Komitəsinin iclasında iştirak edən Erzik mətbuat nümayəndələrinin suallarını cavablandırdı.- Azərbaycanda 2 türkiyəli baş məşqçi çalışır: Mustafa Dənizli və Güvənç Kurtar. Onların işi barəsində nə deyə bilərsiniz?
- Hər iki mütəxəssisin Azərbaycanda olmaları gözəl işdir. Onların həm futbolçu, həm də baş məşqçi kimi futbolunuza çox faydaları var. 20 il əvvəl birgə yola çıxmışdıq. Bu qədər müddətdən sonra 2 dəyərli baş məşqçinin burada olması, inanıram ki, çempionata rəng qatacaq. Bacarıqlı mütəxəssislərdirlər. İnşallah burada uzun müddət qalarlar.
- "Qalatasaray” UEFA Çempionlar Liqasının ilk 1/8 final matçında İngiltərənin "Çelsi” klubu ilə evdə heç-heçə etdi. Martın 18-də keçiriləcək cavab görüşündən nə gözləyirsiniz?
- Azarkeş amili baxımından, üstünlük "Çelsi”nin tərəfindədir. Amma bu komandanın bütün ev oyunlarında qələbə qazanmasına dair öhdəliyi yoxdur. İstanbuldakı matçı televiziya vasitəsilə izləyə bildim. Cavab görüşünün gedişi komandaların heyətləri, zədəli və cəzalı futbolçularla bağlıdır. Futbolda keçirilməmiş matçın hesabı əvvəlcədən deyilə bilməz.
- Bakıya yalnız AFFA-nın konfransında iştirak etmək üçün gəlmisiniz, yoxsa əlavə görüşləriniz də olacaq?
- Xeyr, olmayacaq. UEFA İK üzvləri bəzi ölkələrə gedir. İK-nın iclaslarına qatılırlar. Bura gəlməli olan əməkdaşımız gələ bilmədi. Əvəzində beynəlxalq federasiyanın nümayəndəsi olaraq mən gəldim.
- Uzun müddət UEFA-nın Hakimlər Komitəsində çalışmısınız. Azərbaycan hakimlərinin beynəlxalq miqyasda daha səviyyəli oyunlar idarə etmək şansları nə qədərdir?
- Bunun üçün təcrübə lazımdır. Türkiyədə də yox idi, artıq 40 ildən sonra dünya çempionatına baş hakim göndərirlər. Cüneyt Çakır 2012-ci il Avropa çempionatında da ilk dəfə köməkçiləri ilə birgə yer aldı. Önəmli məsələ UEFA-nın hakimlər üçün konfransı, təlimləridir. Hakimlik həmin konfranslara uyğun olmalı, təhsil prosesini tamamlamalı, Avropa kuboklarında təcrübə qazanmalıdır. Bu, uzun bir yoldur. Hakimlik çətin peşədir. Bu gün futbolunuzda gördüklərim 20 il əvvəl olmayanlardır. Daha əvvəl AFFA-nın Futbol Akademiyasının açılışına gəlmişdim. Çox iş görülüb. Hazırda Bakıda yeni stadion tikilir. Hakimlik də futbolun bir hissəsidir. Ümidvaram ki, müəyyən müddətdən sonra bu sahədə də irəliləyişlər olacaq.
- İstanbulun 2020-ci il Avropa çempionatının yarımfinal və final matçlarına ev sahibliyi etmə şansları yüksək qiymətləndirilir. Bəs Bakının, ən azı, qrup mərhələsinin oyunlarını qəbul etmək imkanlarını necə dəyərləndirirsiniz?
- Turnirin 60-cı ildönümü münasibəti ilə ilk dəfə Avropa çempionatının 2020-ci ildə 13 şəhərdə keçirilməsi qərara alındı. Bakının da digər şəhərlər kimi şansı var. Niyə olmasın? Hazırda inşası davam edən Bakı Olimpiya stadionu da istifadəyə verilmək üzrədir. İşlər çox gözəl gedir, özüm də gördüm. Həqiqətən də xoşuma gəldi. Bu gün vaxtım olsa, gedib içərisində bir qədər gəzəcəyəm. İndiyədək Azərbaycanda 17 yaşınadək qızlar arasında dünya çempionatı keçirilib, 2016-cı ildə 17 yaşınadək futbolçular arasında Avropa çempionatı da burada olacaq. Yavaş-yavaş hədəfə doğru irəliləyirsiniz.
- Qalib şəhər seçimində sizin mövqeyiniz hər hansı rol oynaya bilər?
- Xeyr, bu, mənim işim deyil. UEFA-da hər kəsin bir vəzifəsi var. İcraiyyə Komitəsinin üzvləri ya "hə”, ya da "yox” deyirlər. Onlar verilən məlumatlar çərçivəsində mövqelərini açıqlayırlar. Heç kimin başqasından üstünlüyü yoxdur.
