Bu ilin martında FIFA futbol üzrə dünya çempionatının formatında dəyişikliyi təsdiqləməyə hazırlaşır. Olimpnews.az saytının məlumatına görə, yeniliyə 2026-cı ildən start veriləcək. Dünya çempionatının 32 deyil, 48 milli komanda ilə keçirilməsi nəzərdə tutulur.
Mundialda hər birində 3 komanda olmaqla, 16 qrup formalaşdırılacaq. Hər qrupdan ən güclü ilk iki komanda "pley-off”a yüksələcək. Əgər beynəlxalq futbol qurumu bu təşəbbüsü qəbul edərsə, onda hər bir qitə daha çox yığma ilə iştirak etmək imkanına sahib olacaq. İlkin plana görə, Avropaya - 16, Afrikaya - 9,5 (10-cu vəsiqəni qazanmaq istəyən digər qitə təmsilçisi ilə görüş keçirməlidir), Asiyaya - 8,5, KONMEBOL-a - 6,5, KONKAKAF-a 6,5, Okeaniyaya isə bir yer verilib. Hesablamaya görə, təklif olunan islahat dünya çempionatlarının maliyyə cəhətdən gəlirlərini də artıracaq.
Qeyd edək ki, FIFA komanda sayının 40-a çatdırılma təklifini rədd edib. İndiyədək dünya çempionatı bir neçə formatda təşkil olunub. 1930-cu ildə Uruqvayda keçirilmiş mundialda 13 iştirakçı olubsa, 1934-cü ildə İtaliyaya 16 komanda toplaşıb. 1938-ci il dünya çempionatında 15, 1950-ci ildə 13 komanda çıxış edib. 1954-cü ildən 1978-ci ilədək 16 komanda mübarizə aparıbsa, 1982-ci ildə iştirakçıların sayı 24-ə çatıb. 1998-ci ildən bu yana isə dünya çempionatlarında 32 ölkə təmsil olunur.
jpeg-1758050108.jpeg)
jpeg-1758139617.jpeg)
