Əvvəlki söhbətlərimizdə Birinci dünya müharibəsi dövründə türk-erməni münasibətləri, üsyanlar, köçürmə qanunu və bunların nəticəsi haqqında qısa məlumat verməyə çalışdıq. İndi də bu müharibənin sonunda Mudros sülh müqaviləsi ilə başlayan siyasi və hərbi şərtlər altında keçən türk-erməni münasibətləri haqqında qısa məlumat verməyə çalışacağıq.
30 oktyabr 1918-ci ildə bağlanmış Mudros sülh müqaviləsinə görə, türk ordusu cənub-qərbi İranı və Qafqazı tərk etdiyi zaman, artıq Qafqazda müstəqil Azərbaycan, Gürcüstan və Ermənistan cümhuriyyətləri mövcud idi. Ayrıca Batum, Ahısxa, Ərdəhan bölgəsində də Acar Şura hökuməti qurulmuşdu.
Türk ordusunun 1914-cü il sərhədlərinə çəkilməsi vaxtı gözlənilən erməni hücum və vəhşiliklərinə qarşı mal və canlarını qorumaq zəruriyyətində qalan müsəlman və türk çoxluğunun yaşadığı yerlərdəki xalq dərhal ayrı-ayrı ərazi şura idarələri qurdular. Bunlardan ən əhəmiyyətliləri mərkəzi Qarsda olan Şimali-Qərbi Qafqaz Müvəqqəti Hökuməti ilə Naxçıvan Şura hökuməti idi. Türk ordusu bu yerləri tərk etdikcə, ermənilər Gümrü və Eçmiədzin bölgələrini, Arpaçayı, Arazboyu əraziləri və İqdır bölgəsini sərhədlərimizə yaxın yerlərinə qədər işğal etdilər.
1914-1918-ci illərdə Birinci dünya müharibəsindən müttəfiqlərlə birlikdə məğlub çıxan Osmanlı imperatorluğunun parçalanması və bölüşdürülməsi Antanta dövlətləri arasında müharibənin qurtarması zamanı qərara alınmış, qanuniləşdirilməsi isə Parisdə toplanan Sülh konfransının öhdəsinə buraxılmışdı.
Antanta orduları sıralarında türk ordusuna qarşı vuruşduqlarını və qan tökdüklərini iddia edən ermənilər, Osmanlı imperatorluğunun mirasından pay almaq və «Böyük Ermənistan» qurmaq arzusu ilə Paris Sülh konfransında rəsmən iştirak etdilər.
Ən əvvəl 26 fevral 1919-cu ildə milli erməni heyətinin başçısı Poqos Nübar, ondan sonra da Ermənistan Cümhuriyyətinin naziri A.Aharunyan ermənilərin tələblərini irəli sürdülər. Bu, Qafqazdan Aralıq dənizinə qədər uzanan, Anadolunun yarısı qədər bir ərazidə «Böyük Ermənistan» qurmaq arzusundan irəli gələn tələb idi.
Eçmiədzin katolikosluğu tərəfindən Antanta dövlətləri yanında vəkil edilmiş Poqos Nübar 26 fevral 1919-cu ildə yekun olaraq bunları demişdi: «…erməni könüllülərinin fransız qüvvələrinin yarısını təşkil etdiyinin, Qafqazda Rusiya imperatorluğu ordusunda 150 min erməni olduğunun və 40 min erməni könüllülərinin Nazarbekov komitəsində erməni vilayətlərinin qurtulmasında iştirak etdiklərinin, Türk ordusuna qarşı vuruşaraq, 6 vilayətin, Kilikiyanın və Maraş sancağının türk boyunduruğundan azad edilib Antantanın himayəsinə verdiklərinin müqabilində müstəqil Ermənistan qurulmasını istəyirik».
Belə iddialarla Ermənistan Cümhuriyyətinin naziri də çıxış edərək bayağı tələblər irəli sürmüş, buna əlavə olaraq da, erməni Patriarxiyası da Paris konfransına bir memorandumla müraciət edərək, erməni əhalisinin sayı haqqında uydurma məlumat vermiş, 1882-ci ildə Türkiyədə 2.600.000 erməninin mövcud olduğunu, 1912-ci ildə isə bu rəqəmin 2.100.000 qədər azaldığını söyləmişdi.
Tamamilə uydurma olan bu rəqəmlərə və iddialara qarşı Osmanlı hökumətinin də öz mövqeyi və dəlilləri var idi. 1919-cu ilin 12 fevralında baş nazir Tevfik paşanın böyük dövlətlərə verdiyi notada deyilirdi: «Bəzi erməni dairələrində irəli sürülən və Qafqazdan Kilikiyaya qədər uzanan Böyük Ermənistanın qurulması ağlasığmaz və qeyri-mümkün bir xəyaldır.
Bu ərazidə yaşayan 5 milyondan çox müsəlmanı bir neçə yüz min erməninin ixtiyarına tabe etmək gələcəkdə qarışıqlıqlara, çarpışmalara səbəb olacaqdır. Rus komandanlığının məlumatlarının isbat etdiyi həqiqətlərə istinad edərək, köçürmədən əvvəl rus ordusu şərq vilayətlərini istila etdikdən sonra erməni bandaları həmin ərazidə yaşayan müsəlmanlardan 1.000.000-dan çoxunu vəhşicəsinə öldürmüşlər.
Bütün məmləkət rus orduları və xüsusilə erməni bandaları tərəfindən son dərəcə əzab-əziyyətə düçar olmuşlar və bu gün uçurulub yandırılmamış və talana məruz qalmamış bir qəsəbə və kənd qalmayıb. Erməni hissələri Qafqazda işğal etdikləri yerlərdə müsəlmanlara qarşı bu çirkin hərəkətlərini davam etdirməkdədirlər.
Əhalisinin əksəriyyəti müsəlman olan vilayətlərdə Osmanlı idarəsi altında suveren və azlıq haqlarının saxlanılması və müdafiəsi təmin olunacaqdır. Bu təqdirdə vilayətin əhalisindən olan bütün müsəlman və ermənilər yenidən oralarda yerləşə biləcəklər.
Qafqaz Ermənistan Cümhuriyyətinin genişləndirilməsi ancaq Türkiyədən Qafqaz torpaqlarına qaçmış və Osmanlı hökuməti tərəfindən Birinci dünya müharibəsinin əvvəlində Zor sancağına köçürdülmüş ermənilərin yerləşib-yaşayacaqları qədər olmalıdır. Bu təqdirdə Ermənistan Cümhuriyyətinin köhnə və yeni torpaqlarında yaşayan müsəlmanlar Osmanlı hökumətinin səlahiyyəti altındakı torpaqlara yerləşdiriləcəklər. Osmanlı hökuməti bu iki təklifdən ikincisini məqsədəuyğun hesab edir».
Lakin Osmanlı hökumətinin təklifi qəbul olunmamış və sülh sazişi bağlanmamışdı.
Çünki əsas məqsəd Türkiyəni parçalamaq idi. İngiltərə və Fransa başqa müsəlman millətlərinə örnək olacaq bir Türkiyəni görmək istəmirdilər. Qurmaq istədikləri planla bu məqsədlərini həyata keçirməyə çalışırdılar. Ancaq bunun üçün əlverişli imkanlar əldə edə bilmədilər. Ermənilər tərəfindən edilən müraciətləri tədqiq etmək üçün İngiltərə, Fransa və Yunanıstan nümayəndələri toplandılar. Erməni nümayəndələri Poqos Nübar, Aharunyan və keşiş Zaven də bu məclisdə iştirak edirdilər.
İngilislər ermənilərin istəklərini müdafiə etməklə yanaşı, türk torpaqlarından onlara veriləcək yerləri kiçildərək, belə bir qərar qəbul etmişdilər:
Van vilayəti (Hakkari istisna olmaqla), Bitlis vilayəti (Siirt istisna olmaqla), Diyarbəkir vilayəti (Palu istisna olmaqla) və Ərzurum vilayəti (Ərzincan istisna olmaqla) ilə dənizdən çıxış yolu kimi Trabzon vilayətinin Rizə sancağı.
İstisna kimi göstərilən torpaqlarda da ayrıca bir «Kürdüstan dövləti» qurmaq arzusunu güdürdülər. Bununla belə bu qərar erməniləri razı salmamışdı. Belə ki, İrəvanda toplanan Erməni Milli Şurası İngiltərəyə qarşı çox sərt bir tənqidlə çıxış etmişdi.
Beləliklə, Şərqi Anadoluda bir Ermənistan qurulması və onun sərhədləri məsələsi bu yığıncaqda həll edilmədikdə, bu işin həlli ABŞ-ın o zamankı prezidenti Vilsona həvalə olundu.
Prezident Vilson Ermənistan üçün daha böyük ərazi ayrılmasını layihələşdirsə də, bu iş baş tutmamışdı. Çünki Amerika generalı Harburtun başçılıq etdiyi heyət 1919-cu ilin sentyabr və oktyabr aylarında bütün Şərqi Anadolunu gəzmiş, lakin heç bir yerdə ermənilərin toplum halında yaşadıqlarına təsadüf etməmişdi.
Ermənilərin o zamana qədər bəhanə etdikləri qırğınlardan da heç bir iz yox idi. Əksinə, ermənilər İrəvan və Qars bölgələrində yenidən geniş qətllər və köçürmə fəaliyyətinə başlamışdılar. General Harburt Ərzurumda apardığı yoxlamalar zamanı ermənilərin şəhərin ancaq onda biri qədər kiçik bir məhəlləsində yaşadıqlarından və ona müvafiq kiçik bir qəbiristanlıqdan başqa erməni iddiasına haqq verəcək bir izlə rastlaşmamışdı.
Ərzurumda Ərzurum və erməni tarixi haqqında verilən izahatı dinləyən general Harburtun heyətini bələdiyyə rəisi Zakir bəy pəncərə qarşısına çağıraraq, iki böyük məzarlıqlar (Gəz və Kavak) göstərərək:
- «Bunlar türk qəbiristanlıqlarıdır, şəhərin başqa yerlərində bunlardan on qat çox türk qəbiristanlıqları da var. İndi yaxşı baxın. Orada ətrafı hasarlanmış kiçik bir qəbiristanlıq var. O, erməni qəbiristanlığıdır. İndi ermənilərinmi, türklərinmi çox qırıldığı sizə aydın oldumu? Ermənilər öz ölülərini yemədilər ki», - demişdi.
General Harburt həm aldığı cavab, həm də getdiyi yerlərdə gördüyü həqiqətlər çərçivəsində Amerika senatına verdiyi 16.10.1919-cu il tarixli məlumatında gördüklərini və daha əvvəl türklər əleyhinə verilən məlumatları aydınlaşdırdıqdan sonra: «Qara dənizdən İrana qədər ərazini gəzdik. Lakin erməni məlumatlarını təsdiq edəcək heç bir dəlil tapmadıq», - demişdi.
Bu səbəbdən də Amerika daha ermənilərə mandat verməyi imkansız hesab etmişdi. İstər London, istərsə prezident Vilson tərəfindən aparılmış tədqiqatlar və verilmiş qərarları nəzərə almadan Qərbin dövlət nümayəndələri ermənilərin təbliğatı və Avropa qəzetlərinin bəzi əsassız yazılarına istinad edərək, qərar verə bilməyəcəklərini göstərmişdilər.
Bundan əvvəl də bildirdiyimiz kimi, türklər bu torpaqların heç birisini ermənilərdən almamışdılar. Üstəlik, türklər bu torpaqları aldıqları zaman, dağınıq, parçalanmış, müxtəlif dövlətlər və bəyliklərin itaətində müşkül vəziyyətdə olan erməniləri onların zülmündən qurtarmış və 600 il rahat və əmin-amanlıq içərisində inkişaf etməyə şərait yaratmışdılar. Heç bir yerdə və heç bir zaman erməni əhalisi əksəriyyət təşkil etməmişdir. Qeyd etdiyimiz kimi, dava Türkiyənin parçalanması davası idi.