EURO-2020 üçün Bakının bütün rəqibləri bəlli oldu

EURO-2020-nin matçlarına ev sahibliyi etmək üçün olunan müraciətlərin müddəti buyaxınlarda başa çatıb. Sonuncu müraciət edən tərəf Belçika olub. Belçikalılar paytaxt Brüsseli sifariş ediblər.

Beləliklə, UEFA 19 futbol assosiasiyasından Sifariş kitabı qəbul edib. Bu isə o deməkdir ki, sentyabrda bunlardan 6-sı kənarda qalacaq. Namizədlər arasında AFFA Bakının adını Sifariş kitabında UEFA-ya təqdim edib.

12 standart paketə (qrup mərhələsi 3 oyunu və pley-offun 1 qarşılaşması) aşağıdakı şəhərlər namizəddir: Bakı (Azərbaycan), London (İngiltərə), Minsk (Belarus), Brüssel (Belçika), Sofiya (Bolqarıstan), Skopye (Makedoniya), Budapeşt (Macarıstan), Münhen (Almaniya), Kopenhagen (Danimarka), Qüds (İsrail), Dublin (İrlandiya), Bilbao (İspaniya), Roma (İtaliya), Amsterdam (Hollandiya), Sankt-Peterburq (Rusiya), Buxarest (Rumıniya), Kardiff (Uels), Stokholm (İsveç), Qlazqo (Şotlandiya).

Yerdə qalan 1 paketə (yarımfinal və final matçları) isə 2 şəhər namizəddir. Bunlar İngiltərənin London və Almaniyanın Münhen şəhərləridir. UEFA 13 təşkilatçı assosiasiyanın adını sentyabrın 19-da İsveçrənin Cenevrə şəhərində keçiriləcək İcraiyyə Komitəsinin iclasında müəyyənləşdirdikdən sonra ictimaiyyətə açıqlayacaq.

Qeyd edək ki, əvvəl Avropa çempionatını keçirmək istəyi ilə 32 assosiasiya istəyini ifadə etmişdi. Buyaxınlarda isə Helsinki (Finlandiya), Praqa (Çexiya), Varşava və Xojuv (hər ikisi Polşa) şəhərlərində qitə birinciliyinin keçirilməyəcəyi aydın olmuşdu.